• Հայաստանի Հանրապետություն ալմաստների ներմուծումը կամ Հայաստանի Հանրապետությունից ալմաստների արտահանումը

Հանդիսանալով Քիմբերլի Գործընթացի մասնակից երկիր` Հայաստանի Հանրապետությունում 2003 թվականի հունվարի 1-ից ալմաստի հումքի առուվաճառքն իրականացվում է միայն Քիմբերլի գործընթացի անդամ երկրների հետ և ալմաստի հումքի ցանկացած բեռ, անկախ նրանից այն ներմուծվում է, թե արտահանվում, պետք է ուղեկցվի արտահանող երկրի կողմից տրամադրված Քիմբերլի հավաստագրով:

• Քիմբերլի գործընթացի հավաստագրի գործողության ոլորտը 

Համաձայն Հայաստանի Հանրապետության կառավարության 2003 թվականի N 505-Ն որոշման` Քիմբերլի գործընթացի հավաստագրման ծրագրի պահանջների պահպանմանն ուղղված միջոցառումների իրականացմամբ կարգավորվում է բնական` չմշակված, չտեսակավորված (ԱՏԳ ԱԱ ծածկագիրը` 7102 10 000), արդյունաբերական` չմշակված կամ կոպիտ մշակման ենթարկված (ԱՏԳ ԱԱ ծածկագիրը` 7102 21 000), ոչ արդյունաբերական` չմշակված կամ պարզապես սղոցված, ճեղքված կամ կոպիտ մշակման ենթարկված (ԱՏԳ ԱԱ ծածկագիրը` 7102 31 000) ալմաստների` Հայաստանի Հանրապետություն ներմուծումը և Հայաստանի Հանրապետությունից արտահանումը:

• Հայաստանի Հանրապետությունից ալմաստներ արտահանելու նպատակով հավաստագիր ստանալու համար հայտարարատուն լիազորված մարմին է ներկայացնում հետևյալ փաստաթղթերը`

1. դիմում,
2. արտահանվող ալմաստների ծագման աղբյուրը հիմնավորող փաստաթղթեր (ներմուծման պայմանագրի և հավաստագրի պատճենները, որոնց հիման վրա ներկրվել է հումքի արտահանվող քանակը),
3. տեղեկանք` արտահանվող հումքի մասին (արտահանվող երկիրը, կազմակերպության անվանումը, գտնվելու վայրը, հեռախոսահամարը), արտահանվող ալմաստների արժեքը (ԱՄՆ-ի դոլար), ԱՏԳ ԱԱ ծածկագիրը,
4. առաջին անգամ հավաստագիր ստանալու համար դիմում ներկայացնելու դեպքում հայտարարատուն պետք է ներկայացնի նաև տեղեկանք տվյալ օրվա դրությամբ իր մոտ առկա անմշակ ալմաստի մնացորդի մասին:

• Քիմբերլի հավաստագրի տրամադրման ընթացակարգը

Հավաստագիրը տրվում է լիազոր մարմնի կողմից 3-օրյա ժամկետում: Հայտարարատուի դիմումը կարող է մերժվել, եթե ներկայացված փաստաթղթերը չեն համապատասխանում Հայաստանի Հանրապետության կառավարության 2003 թվականի ապրիլի 23-ի N 505-Ն որոշմամբ հաստատված Քիմբերլի Գործընթացի հավաստագրման ծրագրի պահանջներին համապատասխան միջոցառումների իրականացման կարգի 3-րդ կետի պահանջներին: Դիմումի մերժման մասին երկօրյա ժամկետում տեղյակ է պահվում դիմողին` նշելով մերժման հիմնավորումը:

• Հայաստանի Հանրապետության մաքսային սահմանով ներմուծված ալմաստների բացթողումը

Ներմուծված ալմաստների մաքսային սահմանով բացթողումն իրականացվում է միայն լիազորված մարմնի կողմից հավաստագրի կտրոնի հեռացման և հավաստագրի վրա «Ներմուծումը հաշվառված է» դրոշմակնիքը դրված լինելու դեպքում։ Ներմուծման և արտահանման դիմումների հաշվառման համար վարվում են առանձին հաշվառման գրանցամատյաններ` համաձայն Քիմբերլի գործընթացի հավաստագրման ծրագրով սահմանված պահանջների:

Ոլորտը կարգավորող օրենսդրությունը տես Փաստաթղթեր բաժնում: