ՀՀ էկոնոմիկայի նախարարությունը հայտարարում է ՀՀ և ԼՂՀ տարածքում զբոսաշրջային փաթեթներ և ծառայություններ ձևավորող ու մատուցող զբոսաշրջային օպերատորների կամավոր հաշվառում

ՀՀ կառավարության սահմանած կարգով սոցիալական փաթեթի շրջանակներում ՀՀ պետական մարմինների և կրթության, մշակույթի և սոցիալական պաշտպանության ոլորտների պետական կազմակերպությունների աշխատակիցների և նրանց ընտանիքների անդամների հանգստի կազմակերպման ծառայություններ մատուցող զբոսաշրջային օպերատորների ցանկի ձևավորման և ՀՀ էկոնոմիկայի նախարարության պաշտոնական ինտերնետային կայքում հրապարակման նպատակով հայտարարվում է ՀՀ և ԼՂՀ տարածքում զբոսաշրջային փաթեթներ և ծառայություններ (անհատական և խմբային) ձևավորող ու մատուցող զբոսաշրջային օպերատորների կամավոր հաշվառում:

Հաշվառվել կարող են “Զբոսաշրջության և զբոսաշրջային գործունեության մասին” ՀՀ օրենքով (այսուհետ` Օրենք) սահմանված զբոսաշրջային օպերատորները, որոնք բավարարում են զբոսաշրջային գործունեության սուբյեկտների նկատմամբ Օրենքով սահմանված պահանջներին և վերջին 3 տարվա ընթացքում մասնակցել են առնվազն միջազգային 2 կամ տեղական և միջազգային մեկական զբոսաշրջային ցուցահանդեսի:

Հաշվառման համար շահագրգիռ զբոսաշրջային օպերատորը պետք է մինչև 2011թ. դեկտեմբերի 23-ը, ժամը 15:00 ՀՀ էկոնոմիկայի նախարարություն (ՀՀ էկոնոմիկայի նախարարության աշխատակազմի զբոսաշրջության վարչություն, հասցե` ք. Երևան, Մհեր Մկրտչյան 5, 610 սենյակ, հեռ. (010) 597-157) ներկայացնի հետևյալ փաստաթղթերը`
1. Հայտ (հայտի ձևը կարելի է  ներբեռնել PDF կամ MS Word տարբերակով):

2. Գրասենյակ(ներ)ի տարածքների սեփականության կամ օգտագործման իրավունքը հավաստող փաստաթղթի պատճենը:

3. Տարբեր տևողության 15 օրինակելի զբոսաշրջային փաթեթ, որոնցից առնվազն 5-ը պետք է ներառեն զբոսաշրջային ծառայություններ և/կամ օբյեկտներ ՀՀ օրենսդրությամբ սահմանված կարգով ՀՀ կառավարության հայտարարած զբոսաշրջային կենտրոններում, 2-ը` Լեռնային Ղարաբաղի Հանրապետությունում:

4. Սույն հայտարարության 4-րդ կետով նախատեսված փաթեթներում ընդգրկված առնվազն հյուրանոցային և տրանսպորտային ծառայություններ մատուցող անձանց հետ գործող պայմանագրերի պատճենները:

5. Սպառողի հետ կնքվող պայմանագրի օրինակելի ձևը` հաստատված զբոսաշրջային օպերատորի իրավասու մարմնի կողմից (Օրենքի 16-րդ հոդվածով ներկայացվող պահանջներին համապատասխան):

6. Միջազգային և/կամ տեղական զբոսաշրջային ցուցահանդեսներին մասնակցությունը հավաստող նյութեր/փաստաթղթերի պատճեններ:

Անհրաժեշտության դեպքում հայտ ներկայացրած զբոսաշրջային օպերատորի համապատասխանությունը զբոսաշրջային գործունեության սուբյեկտների նկատմամբ Օրենքով սահմանված պահանջներին կարող է գնահատվել ՀՀ էկոնոմիկայի նախարարության կողմից` զբոսաշրջային օպերատորի գրասենյակում:

Լրացուցիչ տեղեկությունների համար զանգահարել 59 71 57: