Հունվարի 24-ին տեղի ունեցավ ՀՀ էկոնոմիկայի նախարար Տիգրան Դավթյանի մամուլի ասուլիսը: Ասուլիսի ընթացքում Էկոնոմիկայի նախարարը լրագրողներին ներկայացրեց 2012 թվականի ՀՀ էկոնոմիկայի նախարարության գործունեության հիմնական ուղղություններն ու ծրագրերը:

Ըստ Տիգրան Դավթյանի 2012թ-ը լինելու է տրամաբանական շարունակությունը այն ծրագրերի և խնդիրների, որոնք իրականացվել են 2011թ-ին: Նախարարի խոսքով այս տարվա ընթացքում աշխատանքներ կտարվեն Էկոնոմիկայի նախարարության համակարգման բոլոր ոլորտային ուղղություններով, ինչպես նաև ներկայացրեց Էկոնոմիկայի նախարարության 2012թ. գերակա խնդիրները: Դրանք են. արտահանման վրա հիմնված արդյունաբերական քաղաքականության իրականացումը, Համաշխարհային բան¬կի խմբի «գործարարությամբ զբաղվելը» (doing business) վարկանիշային դասակարգման սանդղակում Հայաստանի դիրքի բարձրացման ապահովումը և ՀՀ-ԵՄ խորը և համապարփակ ազատ առևտրի գոտու ստեղծման շուրջ բանակցությունների մեկնարկը և հետագա բանակցային ուղղությունների ամրագրումը:

Արտահանման վրա հիմնված արդյունաբերական քաղաքականության իրականացումը

Ելնելով տնտեսության մրցունակության բարձրացման և շարունակական տնտեսական աճի ապահովման հրամայականներից` ՀՀ կառավարությունը նախաձեռնել է ակտիվ արդյունաբերական քաղաքականության իրականացում: ՀՀ արտահանմանն ուղղված արդյունաբերական քաղաքականությունն արտահանման զարգացման ներուժ ունեցող ոլորտների միջազգային մրցունակության բարձրացմանն ուղղված հավասարակշռված և փուլային միջոցառումների համախումբ է, որի նպատակն է ապահովել արտահանման աճը և դիվերսիֆիկացիան:

Արդյունաբերական քաղաքականության թիրախը վերամշակող արդյունաբերության ճյուղերի և համալիրների զարգացումն է: Ռազմավարությամբ նախանշված արտահանման տեսանկյունից հեռանկարային 11 ոլորտներից` մեկնարկային փուլում ճշգրիտ ճարտարագիտության, դեղագործության և կոնյակագործության համար արդեն իսկ մշակվել են ոլորտային ռազմավարություններ: Աշխատանքներ են տարվում մյուս 8 ոլորտների ռազմավարությունների և դրանց իրականացումն ապահովող միջոցառումների մշակման ուղղությամբ:

Արդյունաբերական քաղաքականության իրականացումն ապահովելու և այս ուղղությամբ ՀՀ պետական այլ կառույցների գործունեությունը համակարգելու նպատակով կստեղծվի ՀՀ վարչապետին կից արդյունաբերական խորհուրդ: Այն կհանդիսանա ռազմավարության իրականացման աշխատանքները համակարգող բարձրագույն մարմին: Միաժամանակ, մեկնարկային փուլի ոլորտային ռազմավարությունների իրականացման նպատակով կստեղծվեն ոլորտային խորհուրդներ, որոնք հարթակ կհանդիսանան պետության և մասնավոր հատվածի միջև երկխոսության համար: Խորհուրդներում կներգրավվեն գործարար միությունների, ոլորտային և մասնագիտական ասոցիացիաների, կրթական և հետազոտական կազմակերպությունների, ոլորտի ընկերությունների ներկայացուցիչներ:

Համաշխարհային բանկի խմբի «գործարարությամբ զբաղվելը» (doing business) վարկանիշային դասակարգման սանդղակում Հայաստանի դիրքի բարձրացման ապահովում

Գործարարության զարգացումը երկրում տնտեսության զարգացման կարևորագույն նախապայմաններից մեկն է: Հայաստանը տարածաշրջանում բիզնեսի վարման տեսանկյունից առավել բարենպաստ երկիր դարձնելու նպատակով պետք է առանձնահատուկ շեշտ դնել գործարար միջավայրի լայնամասշտաբ բարեփոխումները շարունակելու վրա:

Այս համատեքստում ՀՀ էկոնոմիկայի նախարարության համակարգմամբ 2012թ.աշխատանքներ կտարվեն “Գործարարությամբ զբաղվելը” դասակարգման համար հիմք հանդիսացող բոլոր 10 բաղադրիչների բարելավման ուղղությամբ, մասնավորապես` հարկային և մաքսային գործընթացների պարզեցում և թափանցիկության բարձրացում, քաղաքաշինական թույլտվությունների տրամադրման մեխանիզմների կատարելագործում, ձեռնարկությունների փակում և այլն:

ՀՀ-ԵՄ խոր և համապարփակ ազատ առևտրի գոտու ստեղծման շուրջ բանակցությունների մեկնարկը և հետագա բանակցային ուղղությունների ամրագրումը

2009թ. Հայաստանի Հանրապետության և Եվրոպական Միության կողմից նախաձեռնվել են Խոր և համապարփակ ազատ առևտրի գոտու (ԽՀԱԱԳ) ստեղծման շուրջ բանակցություններին ուղղված աշխատանքներ: 2009թ. հունիսին Եվրոպական հանձնաժողովը` փաստահավաք առաքելության արդյունքների հիման վրա հրապարակել է Գնահատման զեկույց, որտեղ նախանշվել են ԽՀԱԱԳ բանակցային գործընթացի գլխավոր առաջնային ոլորտները (Ընդհանուր համակարգում, Առևտրի տեխնիկակական խոչընդոտներ, Սանիտարական և բուսասանիտարական միջոցներ և Մտավոր սեփականության իրավունքներ), որտեղ Հայաստանը պետք է էական առաջընթաց ապահովի ԽՀԱԱԳ բանակցությունների մեկնարկի համար: Գլխավոր առաջնայնությունները և ԽՀԱԱԳ բանակցությունների մեկնարկը ապահովելու նպատակով` ՀՀ վարչապետի 2011թ. օգոստոսի 10-ի թիվ 763–Ա որոշմամբ հաստատվել է ժամանակացույց, որում ներառվել են իրականացվելիք միջոցառումները, ժամկետները և պատասխանատու մարմինները: Իրականացված լայնածավալ աշխատանքների արդյունքում ապահովվել է ժամանակացույցում ներառված միջոցառումների կատարումը և ԽՀԱԱԳ բանակցությունների մեկնարկը ակնկալվում է 2012թ. սկզբին: