Այսօր ՀՀ վարչապետ Տիգրան Սարգսյանի նախագահությամբ կառավարությունում տեղի է ունեցել տեսչական բարեփոխումների համակարգման խորհրդի հինգերորդ նիստը: Հաստատված օրակարգի համաձայն` ՀՀ էկոնոմիկայի նախարարության տեսչական բարեփոխումների քարտուղարությունը հաշվետվություն է ներկայացրել բարեփոխումների շրջանակում իրականացված աշխատանքների վերաբերյալ: Ներկաներին տեղեկացվել է, որ ստուգումների տարեկան ծրագրի ամփոփ տարբերակը տեղադրված է ՀՀ էկոնոմիկայի նախարարության պաշտոնական կայքում: Վարչապետը հանձնարարել է մշակել և հաջորդ նիստին ներկայացնել ստուգումների օրենքում ծագած խնդիրների լուծման նախագիծ և ստուգումների տարեկան ծրագրի օրինակելի ձև:

Խորհուրդը քննարկել և հավանություն է տվել տվյալների էլեկտրոնային փոխանակման միասնական համակարգի մշակման առաջարկությանը: Ամփոփելով հարցի առնչությամբ հնչեցված կարծիքները և դիտողությունները` կառավարության ղեկավարը հանձնարարել է մինչև 2012 թ. սեպտեմբերի 1-ը մշակել և խորհրդի քննարկմանը ներկայացնել համակարգի գործառնության տեխնիկական առաջադրանքը:

Հաջորդիվ զեկուցվել է Աշխատանքի պետական տեսչության ստուգաթերթի նախագծի փորձարկման արդյունքների և բացահայտված խնդիրների վերաբերյալ: Նշվել է, որ արդյունքում ստուգաթերթերի հարցերը վերախմբագրվել են, և լրամշակված նախագիծը կներկայացվի ՀՀ կառավարության հաստատմանը: Մեկ այլ հարցով հավանություն է տրվել Հրդեհային և տեխնիկական անվտանգության տեսչության կողմից իրականացվող ստուգումների համար մշակված ստուգաթերթերի 12 նախագծերին և տնտեսվարող սուբյեկտների մոտ փորձարկման փուլն սկսելու առաջարկին: Վարչապետ Սարգսյանը հանձնարարել է Աշխատանքի պետական տեսչության կողմից իրականացված փորձարկումը նախադեպ դարձնել մնացած բոլոր տեսչությունների համար: Հանձնարարական է տրվել նաև տեսչություններին` մշակել և հրապարակել ստուգաթերթերի կիրառման ուղեցույց և այն փաստաթղթերի օրինակելի ձևերը, որոնց առկայությունը տնտեսավարողի մոտ օրենքի պահանջ է: