Ապրիլի 26-ին ՀՀ էկոնոմիկայի նախարարության հովանու ներքո, «Կանայք և տեղեկատվական հասարակությունը» ՀԿ նախաձեռնությամբ ու Ձեռնարկությունների Ինկուբատոր Հիմնադրամի, ԱՄՆ ՄԶԳ Ձեռնարկությունների զարգացման և շուկայի մրցունակության ծրագրի աջակցությամբ, Հայ-հնդկական ՏՀՏ գերազանցության կենտրոնի, Արևելյան Եվրոպայի և Կենտրոնական Ասիայի Մոբայլ լուծումների տարածաշրջանային լաբորատորիայի, Հայաստանում Մայքրոսոֆթ Ինովացիոն Կենտրոնի և Հայաստանի Ամերիկյան Համալսարանի համագործակցությամբ Հայաստանում առաջին անգամ կնշվի «ՏՀՏ ոլորտի աղջիկների միջազգային օրը»: 2010թ.-ին Հեռահաղորդակցության Միջազգային Միությունը ընդունեց բանաձև` յուրաքանչյուր տարվա ապրիլի չորրորդ հինգշաբթի օրը որպես «ՏՀՏ ոլորտի աղջիկների միջազգային օր» նշելու և դրանով ոգեշնչելու զարգացող ու զարգացած երկրների աղջիկներին ու կանանց ընտրել ՏՀՏ կարիերան:

Նույն օրը ժամը 13:00-17:00-ը Հայաստանի Ամերիկյան Համալսարանում տեղի կունենա «Աղջիկները կարող են զարգացնել ՏՀՏ-ն» ֆորումը, որի ընթացքում ելույթ կունենան ՏՀՏ ոլորտի կրթության, գիտության, կառավարության, արտադրության բնագավառների հաջողակ կանայք` ներկայացնելով իրենց անցած ճանապարհը և հաջողության գաղտնիքները: Ֆորումում նաև կհանձնվեն մրցանակներ տարբեր անվանակարգերում:

****

Լրացուցիչ տեղեկատվություն

ՀՄՄ-ը Միավորված ազգերի կազմակերպության այն մարմինն է, որը պատասխանատու է տեղեկատվական և հեռահաղորդակցության տեխնոլոգիաների համար: Վերջինս լիազորված է խրախուսելու տեխնոլոգիաների օգտագործումը աշխարհում, սահմանել գլոբալ միասնական չափորոշիչներ և բարձրացնել հարցեր` ուղղված տեխնոլոգիաների զարգացմանը: ՀՄՄ-ի հովանավորությամբ «ՏՀՏ ոլորտի աղջիկների օրը» նշվում է ամբողջ աշխարհում: Ավելի մանրամասն տեղեկատվության համար կարող եք այցելել http://girlsinict.org որտեղ կգտնեք նաև օգտակար տեղեկատվություն ՏՀՏ ոլորտի կրթաթոշակների վերաբերյալ: