Ապրիլի 21-ին, Թբիլիսիում կայացել է «BRIDGE» միջազգային տնտեսական համաժողովի արտագնա նիստը: Համաժողովի շրջանակներում ապրիլի 21-ին և 22-ին տեղի է ունեցել «BRIDGE EXPO» հայկական ապրանքների ունիվերսալ առևտրաարդյունաբերական ցուցահանդեսը:

Համաժողովի աշխատանքներին մասնակցել են ավելի քան 40 հայ գործարարներ և պետական կառույցների ներկայացուցիչներ: Ցուցահանդեսին մասնակցել է 33 հայկական ընկերություն:

Ցուցահանդեսի պաշտոնական բացման արարողությունը կատարել են ՀՀ Էկոնոմիկայի նախարարի տեղակալ Տիգրան Հարությունյանը և Վրաստանի Էկոնոմիկայի և կայուն զարգացման նախարարի տեղակալ Միխայիլ Ջանելիձեն: Ցուցահանդես են այցելել Վրաստանի կառավարության և գործարար աշխարհի ներկայացուցիչները, ինչպես նաև Թբիլիսիի բնակիչները: Կազմակերպվել էին հայ և վրացի գործարարների անհատական հանդիպումներ, որոնց արդյունքում ստորագրվել են մի շարք համագործակցության պայմանագրեր:

Միջոցառման ընթացքում տեղի են ունեցել քննարկումներ «Փոքր երկրների մեծ հնարավորությունները» թեմայով, որոնց շրջանակներում ելույթով հանդես են եկել ՀՀ Էկոնոմիկայի նախարարության, Վրաստանի Էկոնոմիկայի և կայուն զարգացման նախարարության ներկայացուցիչները և երկու պետությունների գործարարները:

«Նոր իրականության ընդհանուր կանոնները» նիստի ժամանակ Զարգացման հայկական գործակալությունը և Վրաստանի ազգային ներդրումային գործակալությունը հանդես են եկել շնորհանդեսներով` երկրների ներդրումային հնարավորությունները ներկայացնելու նպատակով: Նաև տեղի են ունեցել «Ջի-Ջի Սոլյուշնս» և «ԳՐԻՄԱՆ» ընկերություների շնորհանդեսները: