ՀՀ էկոնոմիկայի նախարարի տեղակալ Տաթևիկ Սարգսյանը հոկտեմբերի 15-ին մասնակցել է Երևանի Բուսաբանական այգում կազմակերպված խորհրդանշական ծառատունկի արարողությանը, որը նվիրված էր ՄԱԿ-ի Պարենի և գյուղատնտեսության կազմակերպության (FAO) հիմնադրման 80-ամյակին և Հայաստանի Բուսաբանական այգու 90-ամյակին։

Ծառատունկի նպատակն էր ընդգծել շրջակա միջավայրի պահպանության, կենսաբազմազանության պաշտպանության, անտառների կայուն կառավարման և կայուն զարգացման ուղղությամբ իրականացվող համատեղ ջանքերը։

«Այս նշանակալի հոբելյանը հիանալի հնարավորություն է՝ արժևորելու կազմակերպության անցած ճանապարհը և նրա բացառիկ ներդրումը՝ համաշխարհային պարենային անվտանգության ապահովման, գյուղատնտեսության ոլորտի զարգացման և կայուն զարգացման նպատակների իրագործման գործընթացում»,- նշել է Տաթևիկ Սարգսյանը և հավելել, որ Հայաստանի և FAO-ի համագործակցությունը ոչ միայն ծրագրային է, այլև ռազմավարական՝ ուղղված գյուղատնտեսության ոլորտի երկարաժամկետ ու կայուն զարգացմանը։

Նախարարի տեղակալը շեշտել է, որ կլիմայական և տնտեսական նոր մարտահրավերների պայմաններում միջազգային համագործակցությունը դառնում է ոչ թե ընտրություն, այլ անհրաժեշտություն, և Հայաստանի ու FAO-ի գործընկերությունը լավագույն օրինակներից մեկն է, թե ինչպես համատեղ ջանքերով կարելի է հասնել իրական և չափելի արդյունքների։

Միջոցառմանը մասնակցել են ՀՀ կառավարության, ՄԱԿ-ի Պարենի և գյուղատնտեսության կազմակերպության հետ սերտ համագործակցող միջազգային կազմակերպությունների ներկայացուցիչներ, ինչպես նաև դիվանագիտական համայնքի անդամներ։