ՀՀ էկոնոմիկայի նախարարության կողմից Ասիական զարգացման բանկի (ԱԶԲ) աջակցությամբ իրականացվող «Կլիմայական փոփոխություններին հարմարեցվող պարենային անվտանգության բարձրացման» (CAFSEP) ծրագրի շրջանակում հունիսի 18-19-ին աշխատանքային այցեր են իրականացվել ՀՀ Շիրակի և Տավուշի մարզերի ընտրված բնակավայրեր, որտեղ ծրագրի շահառու տնային տնտեսություններին նախատեսվում է տրամադրել օժանդակության փաթեթներ, այդ թվում՝ տնկիներ։

Այցերին մասնակցել են ԱԶԲ առաքելության ներկայացուցիչները, Ծրագրի իրականացման թիմը, ինչպես նաև խորհրդատվական ծառայություններ իրականացնող «Ավենյու Քընսալթինգ Գրուպ» ՍՊԸ-ի և «3 ԱՐ Ստրատեգիա» ՍՊԸ-ի կոնսորցիումի ներկայացուցիչները։

Իրականացվել են այցեր մարզերի գյուղատնտեսական լոգիստիկ հանգույցների հնարավոր տեղանքներ՝ դրանց համապատասխանությունը Ծրագրի նպատակներին նախնական գնահատելու նպատակով։

Ուսումնասիրվել են դրանց հասանելիությունը, ենթակառուցվածքային պայմանները, գյուղատնտեսական արժեշղթաների և շուկաների հետ կապը, ինչպես նաև նախնական դիտարկվել են բնապահպանական և սոցիալական գործոնները։

Ծրագրի ակնկալվող արդյունքներից են գյուղատնտեսական արժեշղթաների զարգացման խթանումը, հետբերքահավաքային կորուստների նվազեցումը, շուկաների հասանելիության բարելավումը, ինչպես նաև համայնքների կլիմայական և տնտեսական դիմակայունության ամրապնդումը։