ՀՀ էկոնոմիկայի նախարար Գևորգ Պապոյանն օգոստոսի 13-ին այցելել է «Աթենք» ՍՊԸ, ծանոթացել մսամթերքի արտադրական համալիրի կառուցման ներդրումային ծրագրի ընթացքին։ Այցին մասնակցել է նաև նախարարի տեղակալ Էդգար Զաքարյանը։

4.8 հա մակերեսով նոր համալիրը նպատակ ունի զարգացնել և ընդլայնել հայկական մսամթերքի արտադրությունը, ինչպես նաև խթանել արտահանումը։
Նախագծով նախատեսվում է իրականացնել 10 մլրդ դրամի ներդրում, որը կուղղվի հումքի և սարքավորումների ձեռքբերմանը, ինչպես նաև նոր գործարանի շինարարությանը։

Ներկայումս ընկերությունում աշխատում է 1433 մարդ՝ 387 հազար դրամ միջին աշխատավարձով։ Մինչև 2026 թվականը նախատեսվում է աշխատատեղերի թիվը հասցնել 1500-ի և միջին աշխատավարձը բարձրացնել մինչև 410 հազար դրամ։

Ծրագրի շրջանակում կկառուցվի երկրի ամենամեծ մսամթերքի գործարանը, որի արտադրական հզորությունը կկազմի օրական մինչև 45 տոննա։

«Աթենք» ՍՊԸ-ն օգտվել է պետական աջակցության մի շարք գործիքներից՝ մաքսատուրքից ազատման արտոնությունից և լիզինգի պետական աջակցության ծրագրից, որի շնորհիվ ձեռք են բերվել ժամանակակից սարքավորումներ։

«Աթենք» ՍՊԸ-ն արդեն անցել է բոլոր անհրաժեշտ փորձաքննությունները և շուտով կստանա ISO սերտիֆիկատ։ Ընկերությունն ունի նաև բուժզննման կենտրոն և աշխատակիցների համար նախատեսված անվճար ճաշարան և այլ առաջնային անհրաժեշտության ենթակառուցվածքներ։