«Ամերիկյան երկրների մրցունակության փոխանակում» (Americas Competitiveness Exchange / ACE) ծրագիրը Ամերիկյան պետությունների կազմակերպության բարձր մակարդակի խոշոր նախաձեռնություններից է և հանդիսանում է տնտեսական զարգացման, նորարարության և ձեռնարկատիրության առաջատար միջազգային հարթակներից մեկը։

Ծրագիրն անցկացվում է յուրաքանչյուր տարի երկու անգամ՝ մեկը ԱՄՆ-ում, իսկ մյուսը՝ այլ երկրում։ Մինչ օրս ԱՄՆ-ից դուրս այն անցկացվել է Մեքսիկայում, Արգենտինայում, Կանադայում, Գերմանիայում, Իսրայելում, Չիլիում և Էկվադորում։ Ծրագիրը հյուրընկալելու համար երկրները հայտ են ներկայացնում սովորաբար միջոցառումից 1–2 տարի առաջ, իսկ նախապատրաստական գործընթացը տևում է առնվազն 8 ամիս։ Ծրագրի տևողությունը սովորաբար 6 օր է։

Ծրագրին սովորաբար մասնակցում է մինչև 70 բարձրաստիճան ներկայացուցիչ՝ նախարարներ, փոխնախարարներ, խոշոր ընկերությունների գործադիր տնօրեններ, առևտրային պալատների ղեկավարներ, ձեռնարկատերեր և ակադեմիական ոլորտի ներկայացուցիչներ։ 2014 թվականից ի վեր, տարին երկու անգամ անցկացվող ծրագրին հարյուրավոր դիմորդներից ընտրվում են շուրջ 50 համաշխարհային և տարածաշրջանային առաջնորդներ, որոնց հնարավորություն է ընձեռվում ստեղծել և ընդլայնել գործարար կապեր, առաջ մղել իրենց երկրների տնտեսական նախաձեռնությունները և զարգացնել համագործակցությունը բիզնեսի, պետական կառույցների և գիտակրթական հաստատությունների միջև։

2024թ. սեպտեմբերի 28-ից հոկտեմբերի 4-ը «Ամերիկյան երկրների մրցունակության փոխանակում» (ACE) ծրագիրը անցկացվել է Երևանում։ Միջոցառմանը մասնակցել են շուրջ 50 բարձրաստիճան պետական պաշտոնյաներ, քաղաքականություն մշակողներ և բիզնեսի ու ակադեմիական ոլորտների ներկայացուցիչներ։

Ծրագրի անցկացումը Հայաստանում նպաստել է միջազգային տնտեսական համագործակցության ընդլայնմանը։ Մասնավորապես՝

• նոր գործարար կապերի ձևավորմանը և ներդրումային ու առևտրային համագործակցության հնարավորությունների ստեղծմանը Ամերիկայի երկրների հետ,
• տնտեսական զարգացման ոլորտում լավագույն փորձի փոխանակմանը և ձեռնարկատիրության խթանմանը,
• կապիտալ ներդրումների և միջազգային գործընկերությունների խրախուսմանը,
• արդյունաբերության, պետական կառույցների և կրթական հաստատությունների միջև համագործակցության զարգացմանը,
• առևտրի ծավալների ավելացման հնարավորությունների ստեղծմանը։

Հայաստանը հանդիսանում է ծրագրի շահառու երկիր և մասնակցում է ծրագրի տարբեր միջոցառումներին։ Մասնավորապես՝

• 2024թ. մայիսին Հայաստանի ներկայացուցիչները մասնակցել են ԱՄՆ Միչիգան նահանգի Դեթրոյթ քաղաքում անցկացված ACE ծրագրին,
• 2025թ. ապրիլի 27-ից մայիսի 2-ը Հայաստանի պատվիրակությունը մասնակցել է ԱՄՆ Իլինոյս նահանգի Չիկագո քաղաքում անցկացված ACE ծրագրին։

Հայաստանի մասնակցությունը ACE ծրագրին հնարավորություն է տալիս ներկայացնել երկրի տնտեսական և ներդրումային հնարավորությունները, խթանել միջազգային համագործակցությունը նորարարության և ձեռնարկատիրության ոլորտներում, ինչպես նաև զարգացնել տնտեսական և առևտրային կապերը Ամերիկայի երկրների հետ։